Müasir dövrdə sosial medianın tələbə öyrənməsinə təsirləri

Abstract

Müasir dövrdə sosial medianın ali təhsil mühitinə inteqrasiyası tələbələrin öyrənmə dinamikasını dəyişmiş, ünsiyyət, məzmun paylaşımı və akademik əməkdaşlıq üçün yeni imkanlar yaratmışdır. Bu tədqiqat işində sosial medianın ali təhsil müəssisələrinin tələbələrinin öyrənmə təcrübələrinə təsiri həm nəzəri yanaşmalar, həm də empirik tədqiqat əsasında araşdırılır. Tədqiqatın məqsədi tələbələrin sosial media platformalarından akademik məqsədlərlə necə istifadə etdiklərini və bu istifadənin təhsil prosesinə mümkün təsirlərini müəyyənləşdirməkdir. Tədqiqat qarışıq metodologiyaya əsaslanır və həm kəmiyyət, həm də keyfiyyət məlumat toplama üsullarını əhatə edir. Tətbiq edilən metodoloji çərçivəyə deskriptiv statistika, etibarlılıq analizi (Cronbach’s Alpha), T-test, ANOVA və korrelyasiya kimi inferensial statistik üsullar daxildir. Bu çoxsahəli yanaşma tələbələrin rəqəmsal davranışları ilə akademik fəaliyyətləri arasındakı əlaqələrin daha dərindən anlaşılmasına imkan verir. Tədqiqatın elmi yeniliyi ondan ibarətdir ki, burada sosial medianın təhsildəki rolu yerli ali təhsil kontekstində, tələbələrin real təcrübələri əsasında sistemli şəkildə araşdırılmışdır. Əldə edilən məlumatlar rəqəmsal savadlılıq, təhsil siyasəti və pedaqoji yanaşmalar baxımından faydalı nəzəri və praktiki nəticələr üçün zəmin yaradır.