Şamaxıda sənətkarlıq: ənənə və müasirlik

Abstract

Tarixən Azərbaycan xalqının məişətində bir çox maddi və mənəvi mədəniyyət sahələri ilə yanaşı ənənəvi sənətkarlıq (toxuculuq, dulusçuluq, daşişləmə, ağacişləmə, dabbaqlıq və s.) da mühüm yer tutmuşdur. Ölkəmizin əlverişli coğrafi mövqeyi, ərazisinin təbii xammal ehtiyatları ilə zənginliyi, həmçinin beynəlxalq quru və su ticarət yollarının üzərində yerləşməsi faktı sənətkarlığın inkişafına geniş imkanlar açmışdır. Araşdırmalar göstərir ki, sənətkarlıq əsasən şəhərlərdə, qismən də bəzi kənd və qəsəbələrdə inkişaf etmişdir. Bakı, Gəncə, Naxçıvan, Şəki, Şuşa, Şabran, Quba, Lənkəran, o cümlədən Şamaxı vaxtilə yalnız Azərbaycanın deyil, eləcə də, bütün Qafqazın ən iri sənətkarlıq mərkəzlərindən olmuşdur. Şamaxı şəhərinin özü ilə bərabər onun Lahıc, Basqal və Nücü kimi kəndləri (Müasir İsmayıllı rayonu ərazisindədir) də ayrı-ayrı sənət sahələrinin intişar tapdığı başlıca mərkəzlər kimi çıxış etmişdir. Onlardan biri də metalişləmə sənətkarlığı olmuşdur.