İctimai rəyin formalaşmasinda medianin rolu

Abstract

Cəmiyyətdə mövcud olan ictimai rəy müəyyən insan toplumu və ya icması üçün məqbul hesab edilərək qəbul edilən fikirlərin, münasibətlərin, inancların və digər sosial hadisələrin məcmusudur. Təbii olaraq, bu rəy müəyyən məsələ və ya hadisə üzərində formalaşan bir sosial fenomen hesab edilir. Media ictimai rəyi formalaşdırmaqla cəmiyyətin gələcəyinin müəyyən edilməsində iştirak edir. O, sosial gerçəklik faktlarına, müxtəlif qrupların və ayrı-ayrı şəxsiyyətlərin fəaliyyətinə münasibəti təsbit edir və özündə əks etdirir. Beləliklə, media qeyrirəsmi kütləvi şüurun mövcud olması üsulu olan ictimai rəyin formalaşması və inkişafında həm məqsədyönlü, həm də kortəbii şəkildə iştirak edir. Təbii olaraq, bu qarşılıqlı əlaqə həyat hadisələrinin, sosial təcrübənin və ənənələrin bilavasitə təsiri altında cərəyan edir. Bəs medianın ictimai şüura təsiri mexanizmləri necə formalaşır? Müxtəlif mərhələlərdən keçərək formalaşan ictimai rəy sosial bir fenomenə, gerçəkliyə və fakta çevrilir. Bu, media yarandığı vaxtdan etibarən bütün tarix boyu ictimai və sosial əlaqələrə və fəaliyyətə nüfuz etməklə öz mövcudluğunu qoruyub saxlamışdır. Deməli, qarşılıqlı təmas rejimlərinin olması daim önəm kəsb etmişdir. Bununla belə, ictimai rəyin formalaşmasından danışarkən, medianın ictimai siyasi sistemdə oynadığı rolun bütün təsir mexanizmlərini və yolunu düşünmədən qarşılıqlı əlaqələrin zəncirini müəyyən etmək mümkün deyildir, çünki media hətta özbaşına buraxılmış olsa belə ictimai rəy formalaşdırmaqda əhəmiyyətli rola malikdir